E Logo fir d’Oktav

Vun 2017 un huet d’Oktav eng visuell Identitéit, déi vun do un op alle Print- an anere Supporten zur Mariewallfahrt erschéngt an esou der Muttergottesoktav en eenheetlecht Erscheinungsbild gëtt. No der positiver Erfahrung mam Logo “350 Joer Stadpatréinesch”, deen am Jubiläumsjoer 2016 genotzt gouf, ass d’Iddi op en Neits opkomm, e Logo z’entwéckelen, deen dynamesch, zäitgeméiss an d’Diversitéit vun der Wallfahrt erëmspiggele géif an an deem senger Mëtt d’Tréischterin mam Zepter a mam Schlëssel an d’Jesuskand stinn.

Ausgeschafft gouf de Logo vun engem Grupp vu Membere vun der Oktavkommissioun zesumme mam Grafiker Jean-Louis Pasque. De Logo gëtt et a lëtzebuergescher an a franséischer Versioun an all Joer mat den Datume vun der Oktavzäit.