lb fr pt en
Jahr A (2016-2017)  
13. Abrëll 2017

Karfreideg – oder d’Leidensgeschicht haut…

Gedanke fir Karfreideg

  • De Jesus gëtt geschlo a gegäisselt.
    Ëmmer erëm ginn och haut nach Kanner, Fraen a Männer geschlo. Et fale Schléi bei brutalen Iwwerfäll, Schléi an d’Gesiicht vun den Aarmen an Ënnerdréckten. Allzegär gäissele Mënschen anere Mënsche mat zynesche Wierder, mat entwiedergenden Demütigungen, duerch systematescht Ausschléissen…
  • De Jesus kritt eng Därekroun opgesat.
    An eiser Welt sinn et d’Däre vun enger uerger Krankheet, déi stiechen, d’Däre vum Elengsinn, déi wéi dinn, d’Däre vun der Aarbechtslosegkeet, déi lämen, d’Däre vum Net-Verstan-Ginn, déi brennen...
  • D’Vollek jäitzt: „Un d’Kräiz mat him!“
    D’Vollek jäizt fir manner Aarbechtszäit, fir méi Aarbechtsplazen, fir méi Loun, fir méi Wuelstand, fir Gerechtegkeet... D’Vollek jäizt, fir zu sengem Recht ze kommen.
    Vill Mënschen halen de Mond virum Misär, virum Honger, virun der Nout, virun der Gewalt, virum Mëssbrauch vu Kanner, Jonken an Erwuessenen, virun esou vill Onrecht, wat dagdeeglech geschitt, viru muench Ongerechtegkeet.
  • De Jesus gëtt un d’Kräiz geschlo.
    E Mënsch erleit e schwéiere Schlag duerch eng schlëmm Krankheet, duerch en uergt Accicent, duerch eng perséinlech Enttäuschung, duerch den Doud vun engem léiwe Mënsch – a fillt sech ganz eleng mat sengem Kräiz…
Dem Jesus seng Leidensgeschicht ass mam Karfreideg net ee fir allemol eriwwer. Si geet weider an eiser Zäit, an eiser Welt, méi no bei äis a méi wäit ewech. All Dag op en Neits. Fir Millioune vu Matmënschen!
Um Mont Sainte-Odile am Elsass (Foto: Monique Hermes)
Monique HERMES
 
Ä e r z b i s t u m    L ë t z e b u e r g   .   A r c h e v ê c h é   d e   L u x e m b o u r g    .   
YouTube
SoundCloud
Twitter
Instagram
Facebook
Flickr
Service Kommunikatioun a Press . Service Communication et Presse
Äerzbistum Lëtzebuerg . Archevêché de Luxembourg

© Verschidde Rechter reservéiert . Certains droits réservés
Dateschutz . Protection des données
Ëmweltschutz . Protection de l'environnement
5 avenue Marie-Thérèse
Bâtiment H, 1er Étage
L-2132 Luxembourg
+352 44 74 34 01
com cathol.lu