D’Sonndesmass gouf vu Péiteng iwwerdroen

D’Sonndesmass gouf op Sylvester, den 31. Dezember, um 9 Auer aus der Kierch vu Péiteng iwwerdroen. D’Chorale Sainte-Cécile huet ënnert der Leedung vum Nicolas Billaux gesongen, op der Uergel huet den Philippe Dehoux begleet.

Chorale Sainte-Cécile vu Péiteng

D’Chorale Ste Cécile vu Péiteng ass 1916 gegrënnt ginn. Si konnt dat lescht Joer hiren 100. Gebuertsdag feieren an huet bei där Geleeënheet en CD erausgi mat liturgesche Gesäng duerch d’Kierchejoer, dee vill Interessi fonnt huet.

Bei der Grënnung war de Chouer, sou wéi dat an där Zäit ugeholl war, e Männerchouer. Säit 1951 ass et e gemëschte Chouer. D’Sängerinnen an d’Sänger gestalten an erhiewe mat hirem liturgesche Gesank all Sonndeg d’Houmass a ginn all Feierdag an all aner kierchleche Feieren hire Cachet. Bei de Festlechkeete vun der Gemeng iwwerhëlt de Kierchechouer och ëmmer säin Deel.

De Chouer huet an deene leschte Méint 3 laangjähreg Memberen duerch Stierffall verluer an zielt momentan 26 Sängerinnen a Sänger mat hirem Dirigent, Organist a Präses. (E puer Membere feelen op der Foto).

Leit vun all Alter, déi Freed um Kierchegesank hunn, sinn bei eis wëllkomm. Mir prouwe mëttwochs owes an der Péitenger Kierch. (bf)

Suivéiert d’Mass e Sonndeg am Live-Stream hei

De musikalische Programm vun der Mass

Chouer: Chorale Sainte-Cécile Péiteng
Dirigent: Nicolas Billaux
Organist: Philippe Dehoux
Hautbois: Nicolas Billaux
Trompett: Jean-Paul Classen

Ënnerstëtzt d’Iwwerdroung vun der Radiosmass mat Ärem Don