Skip to main content Skip to page footer
Äerzbistum Lëtzebuerg logo Äerzbistum Lëtzebuerg logo

Lëtzebuerger Massendénger

Alle Lëtzebuerger Massendénger e gudde Start an dat neit Schouljoer. Vu ganzem Häerze wënsche mir Iech vill Freed beim Léieren, léif Frënn, motivéiert Enseignanten an eng gutt Portioun Courage fir alles Neies, wat op Iech waart.

Merci, datt Dir och nieft der Schoul mat Ärem wäertvollem Déngscht um Altor e wichtegen Deel an de Pare sidd.

Mir wënschen Iech eng gesond, glécklech a geseente Schoulrentrée!

Neiegkeeten aus der Massendéngerzentral

D’Massendénger stinn am Déngscht vu Gott a vun deenen, déi de Gottesdéngscht mat feieren.
D’Massendénger sinn nët nëmmen an der Mass am Déngscht, mee bei allen Zorte vu Gottesdéngschter.
Zu deem Déngscht gehéiert vill: virum Gottesdéngscht alles virbereeden, Brout a Wäin op den Altoer bréngen, Affer ophiewen, schellen oder de Gong schloen, de Wäihrauch gutt dämpe loossen, Käerze bréngen an unhalen, matbieden a matsangen ...

 

De Massendénger-Déngscht ass eng Aufgab an der kathoulescher Kierch. D’Massendénger gehéieren zur chrëschtlecher Gemeinschaft.
Als Chrëscht ass de Massendénger do, fir: eng Jugendmass mat virbereeden, iwwert eise Glawen ze diskutéieren, op Roum oder Lourdes ze pilgeren, a Gemeinschaft ze bieden, klibbere ze goen, an der Oktav dobäi ze sinn, beim Pélé des Jeunes, si fueren op den internationale Massendéngercamp ...

D’Massendénger denken net nëmmen u sech. D‘ Massendénger sinn dobäi, wann et ëm Hëllef fir anerer geet.
Si gebrauchen hir Fäegkeeten, fir sech fir anerer anzesetzen, sief et: beim Porbasar, bei der Ouschtereeraktioun, fir Adventskränz ze bannen, bei der grousser Botz an der Gemeng, beim Krëppespill am Altersheim, beim Chrëschtmaart fir d‘Drëtt Welt, oder vill aner Aktivitéiten

Massendénger sinn awer och Jongen a Meedercher wéi déi aner, déi sech un deene schéine Saachen vum Liewen freeën.

An hirer Fräizäit ënnerhuelen d‘Massendénger munches mat anerem am Grupp: si ginn zesummen an de Kino, si organiséieren eng Grillparty, si maachen een Ausfluch, si verbréngen eng Vakanz zesummen, si ginn eppes besichen, si erliewen een Nomëtteg zesummen, si diskutéieren iwwert aktuell Themen, si fueren op den internationale Massendéngercamp.